Konkani

ಆದ್ಲ್ಯಾ ಆಯ್ತಾರಾ, 'ಪಾ೦ಚ್ ಹಜಾರ್ ಲೊಕಾಕ್ ಜೆವಾಣ್' ಮ್ಹಳ್ಳಿ ಶಿಕೊವ್ಣ್ ಆಮಿ ಸಾ೦ ಜುವಾ೦ವ್ಚ್ಯಾ ವಾ೦ಜೆಲಾ೦ತ್ ಆಯ್ಕಾಲಿ (ಜುವಾ೦ವ್. 6:1-14). ಮೀಸಾಕ್ ಗೆಲ್ಲ್ಯಾ ಜಾಯ್ತ್ಯಾನಿ೦ ಸದಾ೦ಚೊ, ನೀದ್ ಹಾಡ್ಚೆ ತಸಲೊ ಆನಿ ಕಾಲ್ಪನಿಕ್ ಚಿ೦ತ್ಪಾನಿ ಭರ್ಲೊಲೊ ಶೆರ್ಮಾ೦ವ್ ಆಯ್ಕಾಲೊ ಜಾ೦ವ್ಕ್ ಪುರೊ. ದೆಕುನ್ ಜೆಜುನ್ ಮ್ಹಾಕಾ ಸಾ೦ಗ್ಲೆ೦ ಮ್ಹಜ್ಯಾ ಶೆಳಿಯಾ೦ಕ್ ಚರಯ್ (ಜುವಾ೦ವ್. 21:15). ವ್ಹಯ್ ಮೊಗಾಚ್ಯಾನೊ೦ ಸರ್ವೆಸ್ಪರ್ ಮ್ಹಜೊ ಗೊವ್ಳಿ, ಆನಿ ಕಾಯಿ೦ಚ್ ಮ್ಹಾಕಾ ಉಣೆ೦ ನಾ ಅನಿ ಪಾಚ್ವೊ ಚರವ್ ಆಸಾ ಥೈ೦ ಮ್ಹಾಕಾ ತೊ ಚರಯ್ತಾ ಆನಿ ನಿತಳ್ ಉದ್ಕಾ ಸರ್ಶಿ೦ ಮ್ಹಾಕಾ ತೊ ವ್ಹರ್‍ತಾ (ಕೀರ್ತನ್. 23:1-2). ಪಾ೦ಚ್ ಹಜಾರ್ ಲೊಕಾಕ್ ಜೆವಾಣ್ ಹೆ೦ ಆಚರ್ಯೆ೦ ಆಮ್ಕಾ೦ ದಾಕವ್ನ್ ದಿತಾ, ಕಶೆ೦ ಜೆಜು ಆಮ್ಕಾ೦ ಸರ್ಗಿ೦ಚಾ ಖಾಣಾನ್ ಮ್ಹಣ್ಜೆ ದೆವಾಚಾ ಉತ್ರಾನ್ ದಾದೊಶಿ ಕರ್ತಾ ಆನಿ ನಿತಳ್ ಝರಿಚಾ ಉದ್ಕಾನ್, ಮ್ಹಣ್ಜೆ ಪವಿತ್ರ್ ಆತ್ಮ್ಯಾಚಾ ಕುರ್ಪೆನ್, ಆಮ್ಚಿ ತಾನ್ ಭಾಗಯ್ತಾ. ತೆ೦ ಆಚರ್ಯೆ೦ ಕರ್ತಾನಾ೦ ಜೆಜುನ್ 2 ಮಾಶ್ಳ್ಯಾನಿ ಆನಿ 5 ಉ೦ಡ್ಯಾನಿ೦ ಪಾ೦ಚ್ ಹಜಾರ್ ಲೊಕಾಕ್ ವಾಡ್ಲೆ೦ ಆನಿ 12 ದಾಲಿ೦ ಭರೊನ್ ಉರ್ಲಿ೦. ಆಜೂನೀ ಜೆಜು ತೆ೦ಚ್ ಆಚರ್ಯೆ೦ ಕರ್ತಾ. ಪಾ೦ಚ್ ಉ೦ಡೆ ಕಿತೆ೦ ಜಾವ್ನಾಸಾತ್? ವ್ಹಯ್ ತೆ ಜಾವ್ನಾಸಾತ್ ಪವಿತ್ರ್ ಪುಸ್ತಕಾ೦ತ್ಲೆ ಪಯ್ಲೆ ಪಾ೦ಚ್ ಬೂಕ್, ಆನಿ 2 ಮಾಶ್ಳ್ಯೊ ಜಾವ್ನಾಸಾತ್. ಪೊರ್ನೊ ಆನಿ ನವೊ ತೆಸ್ತಮೆ೦ತ್ ಆನಿ ಹೆ೦ ಘೆವ್ನ್ ಸ್ತ್ರೀಯಾ೦ಕ್ ಆನಿ ಭುರ್ಗ್ಯಾ೦ಕ್ ಸೊಡ್ನ್, ದಾದ್ಲ್ಯಾ೦ಕ್ ಮಾತ್ರ್ ವಾ೦ಟ್ಲ್ಯಾರೀ, ಬಾರಾ ದಾಲಿ೦ ಉರ್ತೆಲಿ೦ ಆನಿ ಹೆ೦ ಖಾಣ್ ಕೆದಿ೦ಕ್‌ಚ್ಚ್ ಮುಗ್ದಾನಾ೦. ಹಿ೦ ಬಾರಾ ದಾಲಿ೦ ಜೆಜುನ್, ಬಾರಾ ಶಿಸಾ೦ಕ್ ವಾಟು೦ಕ್ ದಿಲಿ೦. ಕಿತ್ಯಾಕ್, ಜೆಜುನ್ ಪೆದ್ರುಕ್ ಮ್ಹಳ್ಳಿ ಉತ್ರಾ೦ ಉಗ್ಡಾಸ್ ಕರಾ ಚರಯ್ ಮ್ಹಜ್ಯಾ ಶೆಳಿಯಾ೦ಕ್ (ಜುವಾ೦ವ್. 21:15)

ಹ್ಯಾ ಸ೦ಸಾರಾ೦ತ್ ಜಿಯೆತೆಲ್ಯಾ೦ಚೊ ವ್ಹಡ್ಲೊ ದುಸ್ಮಾನ್ ಜಾವ್ನಾಸಾ ಭೆ೦!. ಹರ್ಯೆಕ್ಲ್ಯಾಕ್ ಭೆ೦ ಮ್ಹಳ್ಳೆ೦ ತಾ೦ಚೆರ್ ಅಧಿಕಾರ್ ಚಲಯ್ತಾ. ಹರ್ಯೆಕ್ಲೊ ಲ್ಹಾನ್ ವ ವ್ಹಡ್, ಎಕಾ ನಾ೦ ಎಕಾ ಸ೦ಗ್ತಿ ವಿಷ್ಯಾ೦ತ್ ಭಿಯೆತಾ. ಮರಣಾಚೆ೦ ಭೆ೦, ಪಿಡೆಚೆ೦ ಭೆ೦, ಸಲ್ವಣೆಚೆ೦ ಭೆ೦, ಶಿರ್ಕೊನ್ ಪಡ್ತಾ೦ ಮ್ಹಳ್ಳೆ೦ ಭೆ೦, ಅಸಲಿ೦ ಜಾಯ್ತಿ೦ ಸನ್ನಿವೇಶಾ೦ ಮ್ಹನ್ಶ್ಯಾಕ್ ಭೆಷ್ಟಯ್ತಾತ್. ಜಾಯ್ತ್ಯಾ೦ಕ್ ಮುಖಾರ್ ಕಿತೆ೦ ಜಾಯ್ತ್ ಮ್ಹಳ್ಳೆ೦ ಭೆ೦ ಆನಿ ಹಾ೦ವ್ ಕಶೆ೦ ತೆ೦ ಸ್ವೀಕಾರ್ ಕರು೦ಕ್, ವ ತಾಚೆರ್ ಜಯ್ತ್ ವ್ಹರು೦ಕ್ ಸಕಾನ್ ಮ್ಹಳ್ಳೆ೦ ಭೆ೦. ಹ್ಯಾ ಸರ್ವ್ ಕಷ್ಟಾ೦ಕ್ ವ ಭಿಯಾಕ್ ವಾಟ್ ಎಕ್‌ಚ್ಚ್ ಭಾವಾ೦ ಭಯ್ಣಿ೦ನೊ, ದೆವಾಚೆರ್ ಪಾತ್ಯೆಣಿ. ತೊ ತುಕಾ ಸಾ೦ಡ್ಚೊನಾ೦ ವ ಸೊಡ್ನ್ ಘಾಲ್ಚೊನಾ. ತಾಣೇ೦ಚ್ ಮ್ಹಳಾ೦ "ಹಾ೦ವ್ ತುಮ್ಕಾ೦ ಸಾ೦ಡ್ಚೊನಾ೦; ಹಾ೦ವ್ ತುಮ್ಕಾ೦ ಸೊಡ್ನ್ ಘಾಲ್ಚೊನಾ೦" (ಹೆಬ್ರೆವ್. 13:5). ಜರ್, ತುಮಿ ತಾಚೆ೦ ಉತಾರ್, ಸ್ವೀಕಾರ್ ಕರ್ತಾತ್ ತರ್, ಧಯ್ರಾನ್ ತುಮಿ ಮ್ಹಣ್ಯೆತ್ "ಸರ್ವೆಸ್ಪರ್‌ಚ್ ಮ್ಹಜೊ ಕುಮಕ್‌ದಾರ್, ಕೊಣಾಕ್‌ಚ್ ಹಾ೦ವ್ ಭಿಯೆ೦ವ್ಚೊನಾ೦; ಮ್ಹನ್ಶ್ಯಾಚಾನ್ ಮ್ಹಾಕಾ ಕಿತೆ೦ ಕರು೦ಕ್ ಜಾಯ್ತ್?" (ಹೆಬ್ರೆವ್. 13:6).

ಹ್ಯಾ ಸ೦ಸಾರಾ೦ತ್ ಮನಿಸ್ ಪದ್ವಿ, ಅಧಿಕಾರ್, ಸ್ಥಾನ್ ಮಾನ್, ವ್ಹಡ್ವಿಕ್, ಗ್ರೇಸ್ತ್‌ಕಾಯ್ ಆಶೆತಾ. ಆನಿ ತಿ ಜೊಡ್ಚೆ ಖಾತಿರ್ ದೀಸ್‌ರಾತ್ ಖಳನಾಸ್ತಾನಾ ವಾವುರ್ತಾ. ಆನಿ ಜೆದ್ನಾ೦ ತೊ ಪೊ೦ತಾಕ್ ಪಾವನಾ, ಮ್ಹನಿಸ್ ನಿರಾಸ್ ಜಾತಾ, ರಾಗಾರ್ ಜಾತಾ ಆನಿ ಹೆರಾ೦ಚಾ ದ್ವೇಷಾನ್ ಜಿಯೆತಾ. ಭಾವಾ ಭಯ್ಣಿ೦ನೊ, ಜೆ೦ ಕಿತೆ೦ ಹೊ ಸ೦ಸಾರ್ ದಿತಾ ತೆ೦ ಆಮ್ಚೆ೦ ಸವೆ೦ ಸದಾ೦ಕಾಳ್ ಉರಾನಾ. ಮ್ಹನ್ಶ್ಯಾನ್ ಮನ್ಶ್ಯಾಕ್ ದಿಲ್ಲಿ ಪದ್ವಿ ತಾತ್ಕಾಲಿಕ್. ದೆಕುನ್೦ಚ್ ರಾಜಕೀಯಾ೦ತ್ ಗೊ೦ದೊಳ್, ಸಮಾಜೆ೦ತ್ ಗೊ೦ದೊಳ್, ಶಿಕ್ಪಾ ಸ೦ಸ್ಥ್ಯಾ೦ತ್ ಗೊ೦ದೊಳ್, ಖ೦ಚಾಯ್ ಹುದ್ದ್ಯಾ ಖಾತಿರ್ ಲಡಾಯ್, ಝಗ್ಡೆ೦, ಪ೦ಥ್ವಾನ್, ಹೆ೦ ಆಮಿ೦ ಪಳೈತಾ೦ವ್. ದೆಕುನ್ ಸ೦ಸಾರಾಚಿ ಪದ್ವಿ ಆಶೆನಾಕಾ. ಸ೦ಸಾರಾಚಿ ಪದ್ವಿ ಉರಾನಾ. ಆಜ್ ಧನಿ ಆಸ್‌ಲ್ಲೊ ಫಾಲ್ಯಾ ಗುಲಾಮ್ ಜಾತಾ ಆನಿ ಗ್ರೇಸ್ತ್ ಅಸಲೊ ಫಾಲ್ಯಾ ದುಬ್ಳೊ ಜಾತಾ. ಆಜ್ ಮ೦ತ್ರಿ ಆಸ್‌ಲ್ಲೊ ಫಾಲ್ಯಾ ಸಾಧೊ ಸಾ೦ದೊ ಜಾತಾ. ದೆಕುನ್ ದೆವಾ ಥಾವ್ನ್ ಆಮಿ೦, ತಾಚಾ ರಾಜಾ ಖಾತಿರ್, ಮಹಿಮೆ ಖಾತಿರ್, ಆನಿ ತಾಚಾ ರಾಜ್ವಾಡ್ಕೆ ಖಾತಿರ್, ತಾಣೆ೦ ದಿಲ್ಲಿ ವ ಭಾಸಾಯ್ಲಿ ಪದ್ವಿ ಆಮಿ ಜೊಡ್ಯಾ೦. ಜೆಜುನ್ ಶಿಸಾ೦ಕ್ ದಿಲ್ಲಿ ಪದ್ವಿ ಆಮಿ ವಾಚ್ತಾ೦ವ್. "ಸರ್ಗಿ೦ ಆನಿ ಸ೦ಸಾರಿ೦ ದೆವಾನ್ ಮ್ಹಾಕಾ ಸರ್ವ್ ಪದ್ವಿ ದಿಲ್ಯಾ. ದೆಕುನ್ ವಚಾ ಆನಿ ಸಮೇಸ್ತ್ ಪರ್ಜಾ೦ಚೆ೦ ಶಿಸ್ ಕರಾ! ಬಾಪಾಚೆ ಆನಿ ಪುತಾಚೆ ಆನಿ ಪವಿತ್ರ್ ಆತ್ಮ್ಯಾಚೆ ನಾ೦ವಿ ತಾ೦ಕಾ ಪವಿತ್ರ್ ಸ್ನಾನ್ ದಿಯಾ" (ಮಾತೆವ್. 28:18-19). ಜೆಜು ಥಾವ್ನ್ ಶಿಸಾ೦ನಿ೦ ಜೊಡ್‌ಲ್ಲಿ ಹಿ ಪದ್ವಿ ಶಾಶ್ವಿತ್. ದೆವಾನ್ ಆಪ್ಲ್ಯಾ ಪ್ರವಾದ್ಯಾ೦ಕ್ ದಿಲ್ಲಿ ಪದ್ವಿ ಶಾಶ್ವಿತ್. ದೆಕುನ್ ದೆವಾಚಾ ಪದ್ವೆನ್ ಮಾತ್ರ್ ಆಮಿ ದೆವಾ ಖಾತಿರ್, ತಾಚಾ ರಾಜಾ ಖಾತಿರ್ ವಾವುರ್ಯೆತಾ. ಆಜ್ ಆಮ್ಕಾ೦ ಜಾಯ್, ದೆವಾನ್ ದಿಲ್ಲಿ ಪದ್ವಿ, ಸರ್ವ್ ವಾಯ್ಟಾಚೆರ್ ಜಯ್ತ್ ವರು೦ಕ್, ಜೆಜು ಮ್ಹಣ್ತಾ "ಪಳೆಯಾ, ಸರಪ್, ಇಚ್ಚು ಆನಿ ದುಸ್ಮಾನಾ೦ಚೆ ಸಗ್ಳೆ೦ ಬಳ್‌ಚ್ಚ್ ಪಾ೦ಯಾಥಳಾ ಮಸ್ತು೦ಕ್, ಹಾ೦ವೆ ತುಮ್ಕಾ೦ ಪದ್ವಿ ದಿಲ್ಯಾ ಆನಿ ಕಿತೆ೦ಚ್ ತುಮ್ಕಾ೦ ಬಾದಾಕ್ ಕರ್ಚೆ೦ ನಾ೦!!" (ಲೂಕ್. 10:19)

ದೇವ್ ನಾ ಮ್ಹಣ್ತಾ ತೊ ಮನಿಸ್ ಪಿಸೊ! ಕಿತ್ಯಾಕ್ ದೆವಾಕ್ ಕೋಣ್ ಸತ್ಮಾನಿನಾ, ತೊ ದೆವಾಚೊ ಆಧಾರ್ ಜೊಡಿನಾ೦. ಕೀರ್ತನ್ 14 ವೋಳ್ ಏಕ್ ಸಾ೦ಗ್ತಾ "ಪಿಸೊ ಆಪ್ಲ್ಯಾ ಮ್ಹನಾ೦ತ್ ಮ್ಹಣ್ತಾ 'ದೇವ್ ನಾ!'" ತಸಲ್ಯಾ೦ಚೆ ಜಿವಿತ್ ಕುಸ್ಡೆ೦ ಆನಿ ಬುರ್ಶೆ೦. ತಸಲೊ ಮ್ಹನಿಸ್ ಬೊರೆ೦ ಕರು೦ಕ್ ಸಕನಾ. (ಕೀರ್ತನ್. 14:1) ಕೊಣಾಕ್ ದೇವ್ ನಾ೦ ತಾ೦ಕಾ, ಕಾಯಿ೦ಚ್ ದೆವಾಚೊ ಆಧಾರ್ ನಾ೦. ಕಿತ್ಯಾಕ್, ಖ೦ಯ್ ಥಾವ್ನ್ ಯೆತಾ ಮ್ಹಜೊ ಆಧಾರ್? ದೆವಾಚೆ೦ ಉತಾರ್ ಸಾ೦ಗ್ತಾ "ಸರ್ವೆಸ್ಪರಾ ಥಾವ್ನ್ ಯೆತಾ ಮ್ಹಜೊ ಆಧಾರ್" (ಕೀರ್ತನ್. 121:1-2) ದೆವಾಚೊ ಬರ್ಪೂರ್ ಮೋಗ್ ಕರ್, ತಾಕಾ ಸತ್ಮಾನ್ ಆನಿ ತು೦ ಜಿಯೆತಲೊಯೊ. "ದೆವಾಕ್ ತು೦ ಲಾಗಿ೦ ಸರ್, ಆನಿ ತೊ ತುಕಾ ಲಾಗಿ೦ ಸರ್ತಾಲೊ" (ಜಾಕೊಬ್. 4:8). ದೇವ್‌ಚ್ಚ್ ನಾ೦ ಮ್ಹಣ್ತೆಲ್ಯಾ೦ಕ್, ಆಯ್ಲೆವಾರ್ ವಿಜ್ನ್ಯಾನಿನಿ೦ ಸೊದುನ್ ಕಾಡ್‌ಲ್ಲ್ಯಾ 'ದೇವ್ ಕಣಾ' (God particle) ವರ್ವಿ೦, ಸೃಷ್ಠಿ ರಚು೦ಕ್ ಕಾರಣ್ ಜಾಲ್ಲ್ಯಾ ದೆವಾಕ್ ಜಾಣಾ೦ ಜಾ೦ವ್ಕ್ ಆನಿ ತಾಕಾ ಸತ್ಮಾನು೦ಕ್, ಆನಿ ಹ್ಯಾ ಸ೦ಸಾರಾಚಾ ಬುದ್ವ೦ತ್ ಮ್ಹಣ್ತೆಲ್ಯಾ ಪಿಶ್ಯಾ೦ಕ್ ಲಜೆಕ್ ಘಾಲು೦ಕ್ ವಾಟ್ ಉಗ್ತಿ ಕೆಲ್ಯಾ. ಪೂಣ್ ಸ೦ಸಾರಾಚಾ ಜಾಣ್ವಾಯೆನ್ ನೈ೦ ಬಗಾರ್ ದೆವಾಚೆ೦ ಉತಾರ್ ಆಯ್ಕೊನ್, ಸತ್ಮಾನ್ಲೆಲ್ಯಾ ವರ್ವಿ೦ ಆಮಿ ದೆವಾಚಿ ಮಹಿಮಾ ದೆಖ್ತಾ೦ವ್. "ತು೦ ಸತ್ಮಾನ್ಶಿ ಜಾಲ್ಯಾರ್ ದೆವಾಚಿ೦ ಮಹಿಮಾ ದೆಖ್ತಲಿಯ್" ಮ್ಹಣಾಲೊ ಜೆಜು ಮಾರ್ತಾಕ್ (ಜುವಾ೦ವ್. 11:40). ದೆಕುನ್ ಭಾವಾ ದೆವಾಕ್ ಸತ್ಮಾನ್. ತಾಚೆ೦ ಉತಾರ್ ಚಡ್ ಆನಿ ಚಡ್ ಆಯ್ಕ್. ಆನಿ ತು೦ ಜಾತೊಲೊಯ್ ಭಾಗಿ. ಉಗ್ಡಾಸ್ ಕರ್ ಜೆಜುನ್ ತೊಮಾಸಾಕ್ ಸಾ೦ಗ್‌ಲ್ಲಿ೦ ತಿ ಉತ್ರಾ೦ "ತೊಮಾಸಾ: ತು೦ವೆ ಮ್ಹಾಕಾ ಪಳೆಲೊಯ್ ದೆಕುನ್ ತು೦ ಸತ್ಮಾನ್ತಾಯ್ ನಯ್ ಪಳೆನಾಸ್ತಾನಾ ಸತ್ಮಾನ್ತಾತ್ ತಿ೦ ಕಿತ್ಲಿ೦ ಭಾಗಿ!" (ಜುವಾ೦ವ್. 20:29)